I've continued working with using the IMS-Toucan to create a TTS for Cherokee. Much progress has been made and the system appears usable enough to go ahead and switch over to creating lesson audio. For those interested, I maintain a fork of the repo at Cherokee Language IMS-Toucan.

I've attached readings of The Wolf and the Crawdad, The Search Party, and The Turtle and the Rabbit from the book Cherokee Reference Grammar - Brad Montgomery-Anderson (2015) as well as readings of the Two Hunters story from the Cherokee English Dictionary.

The Wolf and the Crawdad

ᏩᏯ ᎠᎴ ᏥᏍᏛᎾ.

ᎪᎯᎬ ᏥᎨᏒ ᎠᏁᎮ ᏩᏯ ᎠᎴ ᏥᏍᏛᎾ. ᏌᏭᏃ ᎢᏳᏩᎩᏗ ᎠᎦᏚᎵᏍᎬ ᎠᏥᏰᏍᏗ ᏥᏍᏛᎾ ᏩᏯ. ᏩᏯ ᎤᏁᏄᏝᏁ ᏥᏍᏛᎾ ᏧᎾᏙᎩᏯᏍᏗᎢ. ᏥᏍᏛᎾᏃ ᎩᎳᏫᏴ ᏚᎢᏨᏯᏍᏔᏁ ᎤᎾᏙᎩᏯᏍᏗᎢ. "ᎦᎵᏉᎩᏃ ᏕᎧᎾᏢᏛ ᏱᏕᎾᎵᎪᎾ," ᎤᏛᏁ ᏩᏯ. ᎤᎾᏛᎾᏍᏔᏁᏃ ᏧᎾᏙᎩᏯᏍᏗ. ᎠᎬᏱᏃ ᏭᎷᏨ ᎦᎸᏂᏗᎠ ᏫᎧᎾᏢᏛ ᎤᏙᎯᏍᏗ ᎨᏒᎢ. ᏙᏳᏃ ᏍᎩ ᏄᎾᏛᏁᎴ. ᎠᎬᏱᏛ ᏭᏢᏍᏓᏁ ᏩᏯ. ᎦᏂᏓᏛ ᏭᎪᎮ ᏥᏍᏛᎾ ᎤᎿᏃ ᏭᏙᏎᎢ. ᏭᎷᏣᏃ ᎦᎸᎾᏗ ᏗᎨᏒ ᏩᏯ ᎤᏙᎯᏎ ᎥᎾᏫᏛᏍᏊ ᎾᎥ ᎤᏙᎯᏎ ᏥᏍᏛᎾ. ᏃᏭᏃ ᏔᎵᏁ ᏭᏂᎷᏣ ᎤᏠᏱ ᏅᎾᏛᏁᎴ ᎠᎴᏍᏊ ᏦᎢᏁ ᏅᎩᏁ ᎯᏍᎩᏁ ᏑᏓᎵᏁ ᎬᏂᏃ ᎦᎵᏉᎩᏁ ᏭᏂᎷᏨ. ᏍᏓᏲᏒᏛ ᎤᏙᎯᏎ ᏩᏯ. ᏥᏍᏛᎾᏃ ᎾᏍᏊ ᎩᎳᏊᏴ ᎤᏙᎯᏎ, ᎠᏎᏃ ᏩᏯ "ᎦᏙᎬ ᎡᎵᏭ ᏂᏥᏌᏄᎳ ᎢᏧᎳ ᏗᏂᎷᎩ ᎠᎭᏂ ᎧᎾᎵᏛᎢ?" ᏥᏍᏛᎾᏃ, "ᏥᏰᏄᎵᏛ", ᎤᏓᏙᏎᎴ. ᎠᏎᏃ ᏩᏯ ᎾᏭ ᎤᏕᎳᎰᏎ ᎦᏂᏓᏛᏃ ᎦᏙᏍᎨ ᏥᏍᏛᎾ ᎥᏍᎩᏂ ᏳᏍᏗ ᎢᏧᎳᎭᏭ ᏩᏂᎷᎩ ᎦᎧᎾᏢᏛᎢ. ᏩᏯᏃ ᎤᏕᎳᎰᏎ ᎾᏭᏃ ᏓᎦᎦᎿᏁ ᏥᏍᏛᎾ, "ᏙᏳᏛ ᎯᎶᏄᎮ. ᏥᏂᏓᏛᏃ ᏥᏍᎩᎳᏩᏗᏎ," ᎠᎪᏎᎴ ᏥᏍᏛᎾ ᎤᎿᏩᏛᏃ ᎠᏥᎨᎯᏙᎴ ᏥᏍᏛᎾ ᏂᎦᏰᏥᏂᏱᏍᎩ. ᎤᎿᏃ ᏩᏥᏂᏴᏃ ᏩᏥᏯᏱᏁ ᎥᏍᎩᏭᏃ ᏂᎦᎠ.

The Search Party

ᏧᎾᎦᏖᏃᎵᏙᎴ.

ᎷᎯᏴ ᏥᎨᏒ ᏝᏏ ᎡᏍᎦ ᎤᎾᏕᏅ. ᎤᏂᎷᏨ ᏥᎨᏎ, ᎦᏳᎳ ᎤᏁᏙᎴ ᎤᎾᎦᏖᏃᎵᏙᎴ ᎢᎦᏓ. ᎤᎨᎳᏪᏓ ᏥᎨᏒ ᏏᏉᏯ ᏧᎾᏓᏅᏝ ᏓᏘᏂᏙᎮ ᏓᎿᏩ ᎠᏁᏙ ᎡᏉᏂ ᎤᏪᏴ ᎤᏂᏍᏓᏩᏛᏙᎴ. ᎯᎸᏍᎩ ᎠᏁᎲ ᎤᏁᏙᎸ. ᏚᏃᎡ ᎾᎯᏴ ᏥᎨᏒ. "ᎾᏅ ᏧᏲᎱᏒ" ᏨᏚᏙ ᎪᎯ ᏥᎦ. ᎤᏁᏙᎴ ᎤᎿ ᎤᏂᎪᏩᎲ ᎩᎶ ᎤᏲᎱᏒ ᏍᎩᏃᎢᏳᏍᏗ "ᏧᏲᎱᏒ" ᏚᏃᎡ ᎤᎿᎾ. ᏄᎴ ᏌᎷᏱᏂᎨᏴ ᏗᏜ. ᎤᏁᏙᎴ ᎤᎿᎾ. ᎤᏂᎷᏣ ᏍᏈᏍᏙᏒ ᏌᎷᏱ ᎢᏳᏍᏗ ᎤᏩᏂᏕᏍᎩ ᎢᏳᏍᏗ ᏌᎷᏱ ᎨᏎ, ᎥᏍᎩᏃᏳᏍᏗ ᏌᎷᏱᏂᎨᏴ ᏚᏃᏒ. ᎤᎿ ᎤᏪᏴ ᏄᎴ ᏓᏄᎪ, ᏗᏜ ᎤᏪᏴ ᎤᏂᎷᏤ. ᎤᎿᏅ ᏍᏈᏍᏙᏒ ᏚᏂᎪᎮ ᎠᏣᏗ ᏓᏄᎪ ᎢᏳᏍᏗ. ᎤᏍᎩᏃᏳᏍᏗ ᏥᏚᏙ ᏓᏄᎪ. ᏄᎴ ᎠᏥᏍᎬᏂᎨᏍᏛ ᎤᏪᏴ ᎤᏂᎷᏤ. ᎤᎿᏅᏍᏊ ᎠᏣᏗ ᏍᏈᏍᏙᏒ. ᎠᏂᏥᏍᎬᏂᎨ ᏚᏂᎪᎮ. ᎤᏍᎩᏃᏳᏍᏗ ᏥᏚᏙ ᎠᏥᏍᎬᏂᎨᏍᏛ. ᏄᎴ ᏧᏍᏆᎦᏟ ᏥᏚᏙ ᎤᏂᎷᏤ ᎠᎪᏗ ᏳᏍᏗ ᎨᏎ ᎤᎿᏅ. ᎠᏂᎠᎭᏫ ᏧᏂᏍᏆᎦᏟ ᏍᏈᏍᏙᏒ ᏚᏂᎪᎮ. ᎤᏍᎩᏅ ᏧᏍᏆᎦᏟ ᏥᏚᏙᎠ. ᎤᎿ ᎠᎼ ᏭᏂᎷᏤ ᎤᎿᏅᏍᏊ. ᎠᎹ ᏍᏈᏍᏙᏒ ᎬᎾᎨᏒ ᎦᎵᎨᏰ ᎤᎾᏍᎩᏳᏍᏗ ᎠᎼ ᏥᏚᏙᎡ.

The Terrapin Turtle and the Rabbit

ᏄᎵᏍᏔᏂᏙᎸ ᏓᎩᏏ ᏚᎩᏴ ᏥᏍᏚ.

ᏂᎦᏓᏛ ᎤᎾᏅᏖ ᏥᏍᏚ ᎣᏍᏓ ᎠᏟᏙᎯ ᎨᏒ. ᎤᎾᏙᎩᏯᏍᏗ ᎤᏂᏙᎮᏞ ᏥᏍᏚ ᎾᏅ ᏓᎩᏏ. ᎤᏅᏖ ᎬᏩᏠᎯᏍᏗ ᎨᎲ Ꮎ ᏓᎩᏏ ᎤᏍᎦᏃᎵ ᎨᎲ ᎠᏟᏙᎯ. ᏚᏄᎦᏔᏁ Ꮎ Ᏼ ᎢᎦ ᎥᏍᎩᎾ ᏳᎾᏛᏅᏘ. ᏓᎩᏏᏍᎩᏂ ᎨᎲᏃ ᏚᏟᏃᎮᏔᏁ ᏧᎵ ᏃᏊᎴ ᏏᏓᏁᎸ ᎠᏂᏁ. ᏄᏍᏛ ᏚᏭᎬᏛ ᏚᏃᏎᎴ ᏂᎬᏩᏛᏁᏗ ᎨᎲ ᎬᏩᏓᏠᎯᏍᏗ ᎨᎲ. ᏃᏊ ᎤᏍᏆᎸᎯᏞ ᎢᎦ ᎠᏁᎿᎢ ᏂᎬ ᎤᎾᏓᏟᏌᏁ ᎤᎾᎦᏙᏍᏙᏗ ᎠᎾᏙᎩᏯᏍᏗ. ᏄᎾᏛᏁᎴ ᎠᏂᏐ ᏓᎩᏏ ᏚᏃᏎᎸ, ᏄᏍᏛᏃ ᏚᏭᎪᏔᏅ. ᏅᏊ ᎠᎬᏱ ᎦᏚᏏ ᏱᎬᎵᏍᎪᎵᏓᏏ ᎠᎬᏱ ᏫᏣᎶᎯᏍᏗ. ᏏᏅ ᎠᏯ Ꮶ ᏯᎩᎷᎳ ᎣᏂ ᏱᎦ, ᎤᏛᏁ ᏥᏍᏚ. ᎥᏍᎩᏂ ᏄᏍᏛ ᎤᏂᏃᎮᏢ, Ꮎ ᏄᎾᏛᏁᎴ. ᎤᏂᎩᏎ ᏓᎩᏏ. ᎠᎬᏱ ᏦᏓᎸ ᏩᏟᏎ ᏭᎪᎮ ᏥᏍᏚ. ᏅᏊ ᎤᎾᎴᏅ ᎠᎾᏙᎩᏯᏍᎬ. ᏄᏍᏛ ᎤᏂᏃᎮᏢ ᏓᎩᏏᏃ ᎾᏊ ᎾᎾᏛᏁᎲ ᏌᏊᎭ ᏏᏓᏁᎸ ᎠᏁ ᎤᎿ ᏧᎵᎢᎴ ᏱᎩ. ᏦᏓᎸ ᏱᏭᎷᏣ ᏥᏍᏚ ᎤᎿ ᏩᎪᏘᏍᎨ ᏓᎩᏏ ᏫᎧᎾᎷᏍᎬ ᏭᏕᎵᎬ ᏳᏍᏗᎭ. Ꮠ ᏦᏓᎴ ᏱᏭᎷᏣ ᎥᏍᎩ ᎾᎾᏛᏁᎮ ᎥᏍᎩᏴ ᎣᏂ ᏦᏓᎸ. ᎩᎳ ᏩᏟᏒ ᏃᏊ ᏧᏴᏪᏦᏅ ᎨᏎ ᏥᏍᏚ. ᏃᏊ ᏭᎷᏣ ᏭᎿᎷᏒ ᎣᏂ ᏦᏓᎸ ᏭᎪᎮ ᏃᏊ Ꮎ ᏓᎩᏏ ᏚᎩᏯᏍᎬ ᏫᎦᎶᏍᎬ ᎤᎾᏓᎶᎯᏍᏗ ᎠᏍᏓᏅᏅ. ᏃᏊ ᏭᎪᎮ ᏩᏟᏒ Ꮎ ᏓᎩᏏ ᏥᏍᏚᏅ ᏧᏯᏪᏦᏅ ᎨᎮᏃ. ᏭᏅᏥᏞ ᎾᎥ. Ꮭ ᏳᏅᏖ ᏥᏍᏚ ᎨᎮ ᏄᎾᏛᏁᎸ. ᎠᏎ ᏂᎦᏓ ᎤᏂᏠᏱᎭ ᎨᏎ, ᏓᎩᏏ ᏧᎵ ᏃᎴ ᏏᏓᏁᎸ ᎠᏂᏁ. Ꮭ ᏯᏕᎶᎰᏍᎨ ᎾᏅᏛᏁᎲ. Ꮎ ᎦᎩᏏ ᏌᏊᎭ Ꮎ ᎦᏚᏏ ᎣᏓᎸᎴ ᏱᎡᏙᎮ ᎾᏅ ᎣᏂᏃ ᎣᏓᎸ Ꮎ ᏧᎴᏅ. ᏓᎩᏏ ᎨᏎ ᏳᏚᎵ ᎪᏍᏗ ᎩᎶ ᎤᏛᏗ ᏄᎵᏍᏔᏂᏙᎸ ᏭᏅᏥᏝ Ꮎ ᏥᏍᏚ ᏧᏯᏪᏃᏅ ᎨᏎ. ᎤᏠᏱᏊ ᏥᎾᏛᏁᎰ ᎪᎯᏴ ᏥᎩ ᏱᏚᏯᏪᏣ ᏱᎦᏅᎩᏊ.

The Two Hunters

ᎠᏂᏔᎵ ᎠᏂᏍᎦᏯ ᎠᏂᏃᎭᎵᏙᎮ, ᎠᏫ ᏚᏂᏲᎮ. ᏌᏊᏃ ᎠᏍᎦᏯ ᎦᎶᏇ ᎦᏁᎮ ᏐᎢᏅ Ꮭ. ᎾᏅ ᎦᎶᏇ ᎦᏁᎯ ᎤᏢᏈᏌᏘ ᎨᏎ, ᎠᎴ ᎪᎱᏍᏗ ᏳᏛᏁᎳ ᎠᏢᏈᏍᎨ. ᎠᎾᎢᏒᏅ ᎪᎱᏍᏗ ᏭᏂᎪᎮ ᏙᏧᏩᎢᏢ, ᎾᏅ ᎦᎶᏇ ᎦᏁᎯ ᎩᎳᏊ ᎢᏴᏓ ᏫᏚᏍᏓᏲᏞ ᎣᏍᏓᏊ ᏄᎦᏎᏍᏔᏅᎾ ᎢᏳᏍᏗ ᏓᏍᏓᏲᎯᎲ. ᎤᏙᎯᏳᏅ ᏭᏲᏞ ᎠᎴ ᎤᏂᎪᎮ ᎦᏅᎬ. ᎾᏅ ᎦᎶᏇ ᏂᎦᏁᎲᎾ "ᎠᏫ ᎡᏂᏲᎠ!" ᎤᏛᏁ. "ᏥᏲᎡᎦ" ᎤᏛᏁ Ꮎ ᎦᎶᏇ ᎦᏁᎯ, ᎠᏢᏈᏍᎬ. ᎤᎾᏁᎷᎩᏎ ᏙᏧᏩᎢᏢ ᏗᏜ, ᎾᎥᏂᎨᏅ ᏭᏂᎷᏣ ᎤᏂᎪᎮ ᏐᏈᎵ ᎦᏅ. "ᏐᏈᎵᎴ ᎢᎾᏓᎯᏏ" ᎤᏛᏁ Ꮎ ᎤᏲᏢ. "ᎭᏓᎯᏎᎦ" ᎠᎪᏎᎴ.